منتدى طلاب المعهد العالى للتعاون الزراعى
عزيزى الزائر مرحبا بك هذة رسالة تفيد بانك غير مسجل
اذا كنت عضوا معنا فى المنتدى برجاء قم بتسجيل الدخول
اذا لم تكن مسجلا نتمنى انضمامك الى اسرة المنتدى وشكرا

يوميات ابليس وابو جهل3

استعرض الموضوع السابق استعرض الموضوع التالي اذهب الى الأسفل

يوميات ابليس وابو جهل3

مُساهمة من طرف محمود رشاد في الأحد سبتمبر 27, 2009 7:52 am

الحلقة الثالثة

انتهى الاجتماع بين إبليس وشلته .. وخلاص ماشيين
مزمزة هانم في وداع أبوجهل وإبليس .. أبو جهل يسأل إبليس
- على فين المرة دي
- تعال معايا .. هاسهرك سهرة عمرك ما سهرت زيها
- بس الوقت متأخر أوي .. الساعة عشرة بالليل
مزمزة – متأخر ؟؟ .. هههههه .. والله صاحبك ده تحفة أوي يا إبليس بيه .. هو احنا لسه سهرنا ؟؟ .. ده الناس يا دوبها بتصحى من النوم
إبليس – تعال بقى ما تفضحناش .. مش عايز تشرب لك كاسين ؟؟
أبو جهل – آه والله .. في عرضك .. ده انا دماغي خلاص هتضرب
مزمزة – هتروحوا على فين المرة دي ؟
ابليس – هنروح كاباريه (زأططة) .. خليه يشوف له يومين
مزمزة – زأططة حتة واحدة ؟؟ ده انت جامد أوي .. بس خللي بالك على صاحبك .. أحسن ده لقطة وممكن هناك يضحكوا عليه للصبح
إبليس – لا .. ده بيتهيألك بس .. سلام
مزمزة – سلام
ينزلوا في الشارع
عسكري المرور – مخالفة يا بيه خمسين جنيه عشان راكن صف تاني
إبليس – معلش بقى فوتها المرة دي
أبو جهل – إيه الموضوع ؟
إبليس – فيه قانون بيفرض غرامة على اللي يسيب العربية زينا كده
أبو جهل – طب وهتعمل إيه ؟؟
إبليس – ولا حاجة .. هاديله نصهم عشان يسيبنا نمشي
أبو جهل – بس دي رشوة .. أكيد مش هيرضى
إبليس – اسكت انت بس .. خليك في حالك .. خد يا حصـّول .. عشرة جنيه اهي .. عشان تشرب شاي
العسكري – إيه ده يا بيه .. لا .. خليها مش عايزها
أبو جهل – شفت ؟؟ .. مش قلت لك .. مش معقول هياخد رشوة
إبليس ( يبتسم للعسكري ) – ههههه .. طب خلاص .. عشرين اهم .. خلاص بقى يا دفعة
العسكري – تشكر يا بيه .. ما نتحرمش
أبو جهل – إخص على كده .. ياخد رشوة ؟؟
العسكري يبص لابو جهل – بتقول حاجة يا مولانا ؟؟
أبوجهل – باقول ان دي رشوة
العسكري – ياعم الحاج دي إكرامية .. وبعدين ما تقول الكلام ده للحرامية الكبار اللي مجوعينا ومنشفين دمنا .. يعني جت عليا انا ؟؟
إبليس (لأبو جهل) – ياعم انت ما تحبكهاش كده .. أنا مظبط الناس أوي .. تلميذك يا عموووور
أبو جهل – ألا هو احنا لازم نروح البتاع اللي بتقول عليه ده .. ما ينفعش نشرب في أي محل من دول ونروح .. أنا تعبان أوي
- لا .. ما ينفعش .. أصل المسلمين بيحرموا الخمرة .. ولو شافونا سكرانين ممكن يضربونا
- يضربوا مين يا جدع .. خللي حد منهم يقرب مني وأنا أوريك هاعمل فيه إيه
- ياعم مش عايزين مشاكل .. خلينا نروح نسهر سهرتنا بمزاج .. أنا كمان لازم أقابل بقية الشلة هناك
يوصلوا زأططة .. المكان آآآآآآآآآآخر ...... زأططة .. يدخل إبليس ومعاه أبوجهل ..
أبوجهل يبص للمنظر .. الأنوار الحمرا .. والدخان الازرق .. والموسيقى
الصاخبة .. ضحكات السكارى تتردد في كل مكان .. والرقص شغال .. ومش هنتكلم
على اللبس .. آخر زأططة
أبو جهل يتردد في الدخول .. المكان شكله يخض .. يستقبلوه كام واحدة من تلاميذ مزمزة هانم .. بس متفوقين عيها شوية .. التفوق حلو برضه
- أهلاااااااان .. إبليس بيه .. من زمان ما جيتش يا راجل
- كده برضه .. احنا زعلناك في حاجة
- ومين صاحبك ده .. شيك أوي اللبس اللي انت لابسه ده
اتنين يا خدوه بعيد عن إبليس .. يقوموا معاه بواجب الضيافة
أبوجهل (دماغه لفـِّت) – إيه الجمال ده .. تصدقوا انتم بتفكروني بدار بن جدعان (خمارة كانت في مكة أيام الجاهلية)
- دار مين .. ؟؟ .. انت شكلك كده من دولة عربية
- طبعا .. أنا من قريش
- قريش .. والله دمك زي العسل .. تشرب ايه بقى .. ؟؟
- ممكن اشرب لي كاسين خمرة ؟؟
- طبعا .. بس كده .. هنا فيه كل حاجة
- كل حاجة ؟؟ .. بس يعني لو المسلمين عرفوا مش هيعملوا لي حاجة ؟
- حاجة إيه ؟؟ .. ما كلنا مسلمين وموحدين بالله .. إنت إيه حكايتك بالضبط ؟؟
- نعم ؟؟ .. كلكم مسلمين ؟؟ .. أصل يعنييييييييي .. إبليس بيه قاللي كلام
يخوف .. وإن المسلمين مش بيشربوا خمرة .. وممكن يضربونا .. وحوارات كده
- لا لا .. دي نقرة ودي نقرة .. وبعدين احنا شغلتنا كده .. أكل عيشنا ..
وربنا يتوب علينا بقى .. إنت هتقلب لنا الليلة عكننة ليه .. ؟؟
إبليس ييجي
- إيه بس يا جماعة .. فيه إيه ؟
- صاحبك ده غريب أوي .. هو أول مرة ييجي عندنا وللا إيه ؟؟ ..
- معلش معلش .. آخر مرة .. فضحتني منك لله .. ماتعيش حياتك يا أخي وخلاص .. لزومه ايه كتر الكلام
- مش انت اللي قلت لي الخمرة حرام
- طيب .. بس .. بس .. تعالى عشان عايز اعرفك على بقية الشلة
يقعدوا مع أربعة من اصحاب ابليس بيه .. يظبطوا عشان بكره الانتخابات
نتابع الحلقة القادمة ان شاء الله
ابقو معنا

محمود رشاد
مهندس
مهندس

ذكر
العمل/الترفيه : عامل زراعى لاعب كرة قدم فى نادى النجوم
المزاج : احيانا
النادى المفضل : الاهلى
النشاط :
60 / 10060 / 100

الفرقة : الثانية
نقاط : 1002
تاريخ التسجيل : 16/04/2009

الرجوع الى أعلى الصفحة اذهب الى الأسفل

رد: يوميات ابليس وابو جهل3

مُساهمة من طرف Hamada Zico في الثلاثاء أكتوبر 06, 2009 9:02 pm

بي جد حلقات متميزه ويارب تستمر انا شخصيان عجبتني اوي

Hamada Zico
زراعى متدرب
زراعى متدرب

ذكر
العمل/الترفيه : Running
المزاج : Modirate
النادى المفضل : Al Zamalek
النشاط :
60 / 10060 / 100

الفرقة : الاولى
نقاط : 241
تاريخ التسجيل : 22/09/2009

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى